通脹市股票為王(3) - - 陸羽仁 - 頭條日報頭條網Blog City

美國最新經濟數據驚喜參半，申領失業救濟人數創十個月新低，11月份費城聯儲製造業活動指數增長亦好過預期，但10月份領先經濟指數增長只有0.2%，低過低過預期的0.4%，亦遠低過上月的1%增幅。全球股市偏軟，引發投資者對近期股市升勢過急已偏離經濟增長的憂慮，加上日元和美元轉強，原油及大宗商品價格下挫，美林又下調Intel及德州儀器評級，令芯片股大幅下滑。

杜指開市即插水近140點，再略為下挫後，逐步收窄跌幅，但收市仍跌94點或0.9%至10332點；標普500指數失守1100點，收報1095點，下挫15點或1.3%；納指跌36點或1.7%，收報2157點。紐約證交所成交10.8億股，與上日相若。杜指期貨最新報10316點，比現貨低水16點。小型股勢表現更弱，羅素2000指數下挫2.4%。VIX「恐懼指數」回升4.6%至22.63。

港股美國預托證券跟隨美股偏軟，ADR港比指數收報22466點，比香港收市低177點或0.8%。匯控收報95.31元，比香港收市低0.3%；中移動收報76.8元，比香港收市低0.8%。

日元兌16隻主要貨幣上升，而美元亦漲0.5%，美匯指數最新報75.29。原油期貨下跌2.6%至每桶77.5美元，金屬價格亦全線受壓。能源板塊下跌了2.1%，原材料板塊下跌了1.5%，芯片製造行業大跌3.7%，係標普500指數二十四個行業中表現最差。其中Intel跌4.1%，Sandisk跌近5%。

在這種創新高的股市中，好多較穩陣的網友唔敢買股，我可以用美國著名投資家(或投機家)江恩(William Gann)的名句作答:「記住，只要趨勢向上，股票就永遠不會太高而不能買，而只要趨勢向下，它們也永遠不會太低而不能賣; 但請不要忽略這個事實，即你必須永遠用止蝕盤作為保護。永遠順勢而為，不要逆勢而行。在強勢中買股，在弱勢中賣股。」(江恩:在華爾街45年，45 Years in Wall Street)

江恩這幾句話，可以說是他在華爾街炒作40多年的主要領悟，我也奉為炒股的座右銘。我雖然深信價值投資，但無法有股神巴菲特的人際網絡可以攞到好多內幕數據去計數，好多時也無時間詳細研究個別股份以至大市的盈利資料，無法做詳細的現金流折現推算，無法每一隻股都去計哂數先至落注，所以無法做「投資的我」的長線投資決定。但那些時候江恩上面那幾句話就派用場，就當是「投機的我」落場吧，在盡可能研究個股的資料的前題下，更重要的是睇市場的大趨勢，跟住大趨勢走，咁一般都唔會死錯人鮁啦。

如果你斷章取義咁去睇江恩那幾句話，例如話「只要趨勢向上，股票就永遠不會太高而不能買」，好似幾反智，好似叫人合埋眼去買股一樣，江恩當然唔係咁，佢更加係善捉股市轉勢之人，但係佢叫炒股者「相信趨勢」，看似簡單，但實際上卻有好深刻的體會。

網友Myself早前提過，佢在呢個浪太早沽出股票，所以變成一隻蛋家雞----見水唔飲得。我俾佢的建議好簡單，若認為「投資的我」買唔落手，就用「投機的我」出手，等大市調整時下注，而且唔好預佢會調整得太深，等大市見頂後跌5至7%就要開始下注，買齊後定一個較深的止蝕位，來保護自己。在大市接連破高位後，當然會有調整，甚至較深的調整，但只要指數不是破位向下轉勢，買股的風險唔會大過無貨在手的風險，但買齊貨後要訂止蝕位好啲。

好多較理性不太愛炒作的網友，在大市跌到10600點低點時不會沽，因為理性告訴他這是超低位，唔好沽。但等大市反彈到16000點、17000點時會沽，甚至將貨沽清，因為也是理性告訴他咁嘅經濟情況，股市唔應該咁高。這種分析的錯誤是只睇經濟的基本因素，無睇資金供應的基本因素，以美國為首的西方各國大量印鈔，大量資金供應，推高資產價格。咁仲唔夠，美國還要任由美元大貶值，令新興國家的資產在升值預期下顯得更便宜，自然大炒特炒，資金供應也是一種基本因素，不過較易為人忽略。

錯睇股市的基本因素，太早離開市場，一啲都唔緊要，無人永遠啱，錯誤係永恒的，問題是如何糾正錯誤，陸羽仁同樣經常犯錯，所以喜好研究修正錯誤之道。你在17000點沽咗貨，不要介意在20000點、21000點買番。在經濟環境反覆好轉，西方大國又長期不改資金供應政策下，昨天的21000幾點股票好貴，半年後睇變得便宜，所以只要仍肯定大趨勢向上時，只要有止蝕盤保護，不要怕揸貨。正如人最終會死一樣，股市最終會爆，但在佢暴跌之前，可能先有一場暴升。另外，而家還有好多實實際際做生意的二、三線上市公司，股價未大郁，還有好多尋寶的空間，到明年三月部份公布09年全年業績唔係咁差的公司，到時會有一輪上升。當然要買貨都唔好在大市創新高時高追，而係在高位回吐時低吸好啲。

網友Andy188話:「小弟日日都對自已講, 順勢而行啦, 但每次見到的熊仔大割引, 就忍唔住飛身去買, 結果就係損手收場, 呢個可能是人格缺憾, 真係要去睇心理醫生至得囉。」人有時就係咁，睇淡開就一路看淡，而無視資金不斷流入推升大市的事實。簡單一句，順著趨勢做，直到趨勢告訴你佢變咗為止。有時跟唔到大市，轉個頭跟番佢就得啦。

陸羽仁