昨日係感恩節假期，美股休市。港股少咗杜指期貨嘅影響，今日係「背靠大陸自由行」。
美國無市，歐洲股市就好唔掂。市場憂慮銀行借俾主權投資公司杜拜世界(Dubai World) 嘅錢有可能收唔番，銀行股大跌，歐洲三大主要指數勁挫3%以上，創4月份以來最大單日跌幅。據估計，歐洲銀行持有的「杜拜世界」的債務風險敞口達到130億歐元（約195億美元），約佔歐洲銀行整體債務風險敞口的五成。有消息指匯控亦係70個債權人之一，匯控股價大跌4.8%，法國巴黎銀行(BNP Paribas)跌5.1%，荷蘭國際集團(ING Group)跌7.3%，德意志銀行(Deutsche Bank ) 表示在迪拜世界有顯著的債務風險敞口，但股價亦勁挫6.4%。
講了幾天買樓自住是投資也是消費，可能更是一般人最大的投資，看到網友草帽小子的留言，挺有意思。佢話買樓投資特別適合他們這些不分日夜工作的「小密蜂」，因為他忙著工作無時間睇股市行情，而且買樓是強逼儲蓄。草帽小子更表示本來打算用幾十萬去買輛車，現在還是打消這個念頭，還是繼續投資固定資產，看來草帽小子是北京朋友。
我覺得「推遲消費」是致富的關鍵，推遲消費後，把節省所得拿來投資，就能錢生錢。買車和買樓，的確是兩種很不同的購物經驗，幾十萬一部新車，一落地馬上唔見咗五分一的價值，揸五年之後，更加所餘無幾，得番五分之一，賣番出去一啲都唔值錢。假設你30萬買一部車，五年之後得番6萬，再玩幾年渣都無。同樣30萬，如果你搵到一樣年增長10%的投資，7年就翻一翻，變成60萬。
買樓仲厲害，因為有借貸的槓桿，以香港用三成首期買樓計，30萬已經可以買100萬元的樓，如果樓價升三成，以你投入的本金計，扣除負債，資產淨值已升了一倍，30萬變60萬。若你在大陸買樓，第一間樓可以做八成按揭，30萬可以買總值150萬的樓，假設7年樓價升一倍(樓價上升有時快啲有時慢啲，二三線城市的樓價可能落後啲會升得快啲，或者三、五年已可升一倍，價值150萬的樓變咗300萬，好簡單化咁計，唔計你供款時已還咗本金，扣除借貨的120萬，已有180萬元淨資產; 當中你付咗利息，但亦住咗間樓，利息可以當係租金，換句話說，即係30萬買咗樓經過5年、7年變咗180萬，但同樣30萬，用來買車揸，7年後差不多化為烏有，你話消費同投資差別幾大。你放多7年，間樓再升1倍，300萬的樓可以變600萬，或者再翻一翻時間要長啲，假設10年吧，經過這麼長時間，你間樓好可能供滿咗，變咗有600萬淨資產。
年青時唔買一架車，中年時就可以多500、600萬，你可見唔消費攞去投資的威力有多大。所以買架車不如買間樓，真的想要揸架車威威時，不如去租架平治揸番一兩個星期，過吓手癮算啦。
買樓另一個好處是逼人作長線投資，網友Rob問起，他在05年在深圳後海區買了一個150平方(約1500呎)的單位，買時7000多元一平方，而家升到22000元一平方，租金收益只有2厘多，他覺有泡沫。他問可唔可以把單位沽出，等樓價下跌後買番，還是長揸5年10年。高沽低揸，係「精仔行為」，做得到最好，但執行有難度。如果你的單位在香港，我的答案可能係「沽吓都無壞」，因為樓價偏高時，再升唔係咁易。但如果你的單位在內地，樓市雖然會波動，但是波動向上，行三步退一步，出入的時機唔係咁易把握。我買樓賣樓經常問一個問題，間樓10年有無可能再升1倍呢? 若10年有可能升1倍，我賣樓會好小心，怕賣咗自己忍唔到手買唔番。若估計將來升幅有限，而家價錢升得太顛時，又唔怕沽吓。不過還原基本步，諗唔掂就唔郁好過郁了。記住買樓其中一個好處，係「逼人作長線投資」，好多人出出入入就做唔到長線投資。
大陸朋友考慮買樓問題，簡單過香港朋友好多。買樓的好處，背後是壓抑消費，增加投資，特別是長線的投資。如果你覺得香港樓買唔落手，可以買大陸樓，可以買紅色股，有錢就買，買落就儲住長揸，揸佢10年、20年，必有所獲，唔好將啲錢食哂使哂就得啦。
陸羽仁
(我外出公幹，要稍後才能回覆大家的問題)
