週末看到網友阿John的留言，覺得有需要講講年青人的投資理念。
阿John的第一個留言是這樣，「現覆述友人的一番說話："我今日睇個blog，講有個後生仔廿六歲，一畢業出黎做account，月入六千。適逢佢在報章讀到巴菲特入股中石油，佢把心 一橫，從各大銀行盡借得50多萬全煲中石油，現在坐擁資產近800萬，仲有錢買巴郡既股票。" 」
阿John再講，「友人的回應:"我決定放晒手頭上既股票兼到銀行盡借，然後盡地一鋪喪煲一隻股份，博一博....一係買中石油，一係就揀中移動!"」阿John後再話他自己現在２６歲，有１０幾萬，希望３０歲前可以賺１００萬，所以想瞓身買股。
陸羽仁 當時我的反應是「死得」。聽人講誰人怎樣發達，沒有多大意義，股神巴菲特在１元多時買中石油（０８５７），和你現在中石油８．９５元時買，差距好大。去年油價急升，全球油股扯上高位，後來油價回順，石油股亦回吐，雖然中石油聲稱其上下游業務平衡，油價升跌對其影響中性，但油價變動對全球油股有影響，若然油價升上１００美元，肯定油股價當炒，若油價長期回到低位，油股就無戲睇。油價波動對油股影響好大，中石油現價似乎不是借錢去買、實贏不輸的股票。
講到中移動（０９４１），雖是好股，也是操控大市工具，大戶想大市上時就把中移動舞上，要大市跌時就把中移動舞落，波動好大，如今指數仍在高位，另一巨股匯豐（０００５）無貢獻，主要靠中移動。講到基本因素，中移動最大賣點是大陸流動電話市場的一哥，財雄勢大，盡享高增長市場的優勢，但有兩個潛在負面因素，首先是現時內地搞3G，由國產貨打頭陣，中移動投１５０至２５０億去搞（有幾多由上市公司做唔係幾清楚），但內地評價是國產3G唔掂，最後到其他公司做外國3G時，中移動就比較被動，而且3G的概念除了對供應商有利之外，對營運商概念價值愈來愈低，生意價值唔知。第二個潛在風險是內地電訊市場快將大執位，最後可能三強鼎立，三大集團都有流動電話牌照，例如聯通和網通合併，對中移動競爭力會加大。總之一句講哂，這隻股票若不是在４０元入貨，也不是可以買了合埋眼唔睇就一定會發達，要善觀內地電訊市場變化對中移動的影響。
阿John話自己的心水是中石油和交通銀行（３３２８），再講吓交行，現價７．８元，股價不太便宜，雖然陸羽仁在頭條日報專欄講到五行公布業績期有投機價值，而交行率先公布業績，數字不差，但同樣不是正到無可抗拒的股份。記得去年招商銀行（３９６８）上市時，上市價９個幾，市傳股神巴菲特入股，我已經話以這種價錢，巴菲特會唔會入股呀？結果證實股神入股只是流料，雖然招行現價１５．７４元，我都係咁講，招行是好股，但價貴。同樣道理，交行有匯豐入股，協助改善管理，基本因素不俗，但以長線投資來說，價錢貴，所以只能投機買入，見好即收。
所以簡單總結，若想把所有儲蓄一舖投入，甚至借錢去買，以這幾隻股目前的價位，不是絕佳長線投資對象，甚至可以講，１９０００點的市道也不是好對象。大市在高位回落，中期可以升番上２２０００點樓上，再創新高，也可以跌落１６０００點、１７０００點，所以長線投資絕對不能合埋眼就瞓身，特別是借大錢去瞓身，絕對唔鼓勵。要買股就只能擇優吸納，買了也不一定要長揸不放，大市若有幸升到２３０００點，我會叫你沽。
不過後來阿John再留言，講到他是２６歲的後生仔，每月儲到７０００元，我就覺得是另一個故事，月儲７０００元，年儲８．４萬，４年不計利息都有３３．６萬，加埋原有１０幾萬，已有５０萬，若以穩陣投資計，一年回報１０％多少少，４年複式加上去有１０多萬，共有６０多萬，若收入有增長，就算３０歲儲唔到１００萬，３１、３２歲都有機會做到。
我對年青人有幾個建議：第一，努力工作，在香港這種「下流社會」，如果努力掙扎，做到上流人，收入會好好，這是賺錢最好方法，不是投資，而是工作可今你致富，你做好的，每個月搵多１０００元，你計吓做３０年合供可以搵多幾多？
第二，堅持儲蓄，就可發達，複利的效應好驚人，唔好有錢駛哂。
第三，投資要穩陣，不宜太進取，阿John引述的投資方法，特別借錢去做，千祈咪試，你記往要累積致富，首先要保往不輸，不宜去博高風險行為，「聽講話」有人用這種方法贏了８００萬，我話俾你聽，我在１９７４年睇見一個經紀輸到走路，做黑市居民去外國做黑工，拋妻棄子，你話值唔值得博呢？這是真事，唔係「聽講話」，我當時細細個都諗，「點解呢的人賭得咁盡呢？」。
第四，投資無得懶，唔想下工夫，只有一個方法，每逢大市暴跌２５％以上（即是由２１０００點大跌５０００點個種），等那些時候去買盈富基金啦。
陸羽仁
