大市波動，講了兩日波動市應對之法，再續年青人投資的話題。年青人大把青春，輸得起，他們輸了可以再來，不似中年人咁保守。不過年青人這種想做就做、不怕危險的性格，亦好易被人利用，賭錢就是一個典型。
賭錢贏大錢的故事會到處傳揚，賭錢輸身家的故仔家醜不出外傳，炒股都一樣，你買中一隻股票，贏了錢，會忍不往到處向人講，話自己點叻點叻。你睇錯一隻股票，輸到得番零頭，就唔想再提，這個輸錢的故事就會埋沒人間，開賭局的人會好多謝你。
我做過小統計，問十個經紀，在一般市況下，經常炒進炒出的散戶，贏錢多還是輸錢多，大多數經紀的答案是「輸多贏少，唔輸已經好叻」，通常經紀會話自己屬於這種「唔輸都好叻」這一類別的人，但解釋話生意淡時，自己都炒吓Day trade（日中交易），叫做開吓單啦。而且三、四年才會來一次升市，正常都是沉悶市多一的。
你見我咁講，心中可能會駁我，唔係噃，我阿媽這一兩年炒股都贏錢。對，的確如此，０５年、０６年不少散戶有錢賺，特別是０６年，你睇吓恒指和國企指數都知，這兩年咁升法，散戶追熱門股，好易中。
有網友話對２５％的增長睇唔上眼，因為國企都成倍咁升。對廿幾歲的網友來講，眼見為真，去年炒紅色股真係合埋眼都中，有的真係升一倍（雞股更加唔止）。你睇內地股市更厲害，上海綜指由１０００點升上來，而家近３０００點，短短一年升咗兩倍，仲唔係炒到人發狂？
但後生仔要記往，眼見為真的事情，係不能不斷重覆的，大話最怕計數，而家國指９０００點，升一倍到１８０００點，你話會唔會？而家大陸股市３０００點，唔以為好易再升兩倍到９０００點，即使再升一倍到６０００點，都已經係一個驚人大泡沫。
以７３年的香港大牛市為例，年頭恒指還未到９００點，到７３年２月可以一日升１８０點，等於一日升２０％，結果到３月尾升到１７００點就爆煲，泡沫爆破前恒指３個月可以升１倍；在７３年頭幾個月炒股，當然愈係盲俠就愈贏得多錢，因為唔止炒到龍尾股，雞尾股都炒都飛沙走石矣（李四叔叫人買龍尾股，其實都是一個危險訊號）。
牛市炒到顛時，尾段會升得好急，但泡沫一穿也會爆得好快，而大陸政府做的事是不斷為泡沫放氣，這樣可以阻慢股市上升，理論上可以玩耐少少。如果阿爺不出招放氣，大陸股市都夠膽死三、四個月升一倍，跟往就玩完。
綜合而言，後生仔要明白幾件事：第一，賭錢是輸多贏少，賭股票也一樣（低價買好股長線投資例外），如果呢一期個個師奶阿叔都贏，邊個輸呢？絕對可能係股市跌錢黨的「跌錢期」，跌到咁上下，你執到咁上下，你就會俾人一舖清袋o架啦。賭仔最佳對策唔係望自己發大達，係望自己安全離場，執番佢幾成，走番一部份股票都好噃。我咁o既建議，短期可能「累」你賺少咗，但你唔好怨我，你睇三、五年先至黎同我講啦，我有水晶球o架。
第二，唔好借盡，唔好博盡。既然明知大市就算調整完會再試高位，但都係位高勢危，就千祈唔好同銀行借到盡來「喪煲」一兩隻股票，這樣做風險大到你唔信。寫這系列文章之初，源於有網友「聽人講」有人這樣喪煲中移動（０９４１）發了達，賺咗８００萬。你而家又想來喪煲，唔好講借太多，假設你按間樓借１００萬，衰起上來，一煲就中伏，欠銀行一百萬，你估要幾年才還得清？睇怕都要白做１０年、８年，未來咁多年的血汗要白花，仲要損失１０年、８年的投資機會，博唔博自己諗。
第三，青春就是本錢。後生仔廿幾歲，還有幾十年投資累積財富的機會，若果廿幾歲有１０萬，一路再儲錢，加上良好管理的投資，例如在市況低迷時專揀優質新股買入長揸，到四十歲時，累積到幾百萬的資產，絕不為奇。十個人咁做，有八、九個可以到岸，但一萬個爛賭鬼，無一個可以賭到變百萬富翁，後生仔醒吓啦！唔好再「聽人講」啦！
陸羽仁
