有報道指希臘將有進一步削減預算赤字的措施，使市場緩減對希臘主權債務危機的擔憂。巨企併購消息繼續刺激市場投資情緒，美股昨早造好，杜指收復今年所有失地，但本周五將公佈重要的非農業就業數據前，投資者對此有啲審慎，大型科技股和銀行股午後升幅收窄，杜指逐步回落，更一度倒跌，尾市略彈。
杜指收市報10406點，微升2點，較2009年收市低22點；標普500指收報1118點，亦微漲2點或0.2%；納指收報2281點，升7點或0.3%；羅素2000種小型股漲0.9%。杜指期貨最新報10398點，比現貨低水8點。VIX或「恐慌指數」續跌1%至19.1。
港股美國預托證券造好，ADR港比指數收報20984點，比香港收市高78點或0.4%。匯控回穩，收報81.17元，比香港收市高0.8%；中移動收報76.31元，比香港收市低0.3%。
歐盟表示預計希臘將公佈進一步削減預算赤字的措施，令市場稍稍放心。歐洲股市連續第3個交易日上漲，歐洲三大股市昨日都升逾1%。
連串的企業併購消息繼續提升大市人氣，繼上日英國保誠同意以355億美元收購AIA集團的亞洲壽險業務，陶氏化學昨日表示，將向私募基金Bain Capital Partners出售部份業務，股價收高0.7%；化肥生産商CF Industries Holdings Inc亦上調對Terra Industries Inc的敵意收購報價，CF Industries跌1%，後者則勁升近一成一。併購交易增多，顯示金融市場趨穩及經濟正在改善。
早兩日講「唔輸做富翁」的題材，仲想再講吓，有個網友咁樣留言「陸sir,看完你的兩篇"唔輸做富翁"文章, 都有些同感, 自己都可以算係個富翁, 比上(即係比起好多香港或內地富豪)不足, 比下有餘, 但秘訣並不是投資, 而只是努力工作及過著十分節儉的生活, 過去二十年太過專注工作, 沒有時間精神去研究股票, 到近年工作漸上軌道, 才小試牛刀買o下股票, 可能太過驚青, 贏粒糖, 輸亦輸粒糖, 即係無贏無輸, 收入來源全靠份工。」
呢位網友層自住樓供完，我估佢手上仲有幾百萬現金，都算小富啦，靠的是努力工作和節儉生活，這是我長久主將的「投資ABC」，就係「投資自己，合理節儉，唔輸致富」。我覺得呢個方法最易做，但我又無太大力鼓吹，亦有原因，第一咁樣講出來好似太ABC，無形無款，好多人未必受。第二，而家成日拗８０後、９０後，講到佢地好似毫無機會，再叫佢地努力工作怕俾人柴台。第三，有不少網友已經４０幾、５０幾、６０幾，而家叫佢地努力工作有啲過咗時機，唔條「橋」唔係人人啱。
不過去後生仔而言，呢個「投資ABC」的道理仍然要講，自己係最大投資，你將自己睇成一隻股票，如果搞得好，可以愈做愈大，每個月為你提供好好回報，直頭係生金蛋的鵝一樣，若然做得好，無其他投資可以為你帶來咁穩定的高回報，所以第一件事要試吓投資自己，做好份工。在做工頭五年係投資期，回報唔高，但係行啱條路，將來就會上軌道。頭五年做嘢最基本的方法係博命，好多人以為老細最鐘意請精仔，請咗精仔就交到好業績，但事實上精仔好多都太精，出一分力要二分回報，老細要應付佢地日日敲門講數要加人工都幾煩。但有啲人唔係咁精，但勝在夠博，老細反而鐘意呢啲人，做到嘢，到有機會時，老細會先諗呢種人。（由於呢個係投資網誌，愈講離題，唔再講咁多）
假設你事業中規中矩，唔好唔壞，要有身家，就唯有靠節儉，賺３萬儲到２萬最好，供樓亦可當做一種投資，供樓的錢都算投資唔算消費，除非你住超哂你身份的豪宅又另計。你開頭可供投資的錢好少，但愈儲就會愈多，這又回到我講的核心議題，唔好輸錢，唔好投資輸哂，情願回報少啲，但要穩定向上，如在跌市的年頭有正回報則更佳。
網友stockinvest的經驗可供參考，佢話「想說說我從投機變投資的過程。我在96年開始打工, 97年股市大升, 帳面大賺; 後來股市大跌, 有做止蝕, 仍虧本收場。2000年科網大炒, 我的資本已超過150萬, 對於一個當時不足30歲, 工資只有1萬多元的我, 感到很有股神Feel。正當資本逼向200萬前, 科網又爆。我止賺股票後, 又再入市, 到沙士時更變得虧本嚴重。這次後, 對保本感到很重要。」
「05後股市大升, 恆指3萬多點時, 資本最高近550萬; 08年股市大跌, 由於組合(大部份轉為現金)防受性強, 資本最低也有450萬。今天要保飯碗已不容易, 要工資升更不用想。如把資本輸清, 15年後也蓄不回這筆資本。」
Stockinvest話「有幾點經驗想和大家一起研究: 過去10年, 如組合未能走赢中電或港燈 ( 股價升80%, 每年股息4~5% ), 組合還是買一些公用股。無百分百穩陣的股票, 分散投資是必須的。我現在帳面虧損最重是滙豐和宏利。牛市一期如能買入細價股(或Warrant), 升幅非常可觀。熊市一期(或組合大跌20%, 包公用股時), 組合最好大部份轉為現金, 投機點, 則反手做淡。希望大家10年後, 投資成積都更進一步。」
Stockinvest有450萬資本，我估也不完全是投資股票賺回來，相當部份也是打工13年幾儲回來。但佢從開頭全部炒，到現在比較多投資，知所進退，就是一種進步。佢提到將自己投資和中電、港燈這些高息公用股10年走勢比較，有一定道理，過去10年中電港燈加埋派息，累積回報有120%以上，如果自己炒作無咁樣回報，都係減少投機，增加投資好啲。
陸羽仁
