昨天係美股從去年最低位開始反彈的一週年紀念日，杜指繼續牛皮，先升後回，全日波幅仍只有80點，收報10564點，微升12點，標普500指數升2點至1140點；納指漲8點或0.4%，收2341點。杜指期貨最新報10564點，比現貨持平。。
港股美國預托證券繼續個別發展，ADR港比指數基本持平，收報21195點，比香港收市低12點。匯控收報81.79元，比香港收市低0.9%；中移動收報74.34元，比香港收市高0.4%。
喺去年3月9日嘅時候，你問投資者對股市前景點睇，普遍的答覆都係：「更差」。不過就喺第二日，當時全美最弱雞嘅金融機構花旗集團公佈的季度業績，係自2007年以來表現最好嘅，杜指當日勁彈379點，並開始一個巨型升浪。至昨日，杜指已經升咗61.2%、標普500指數68.3%、納指仲勁，升了83.8%。雖然美股仍較2007年高位低約25%，但呢個升浪已經係自1930年以來最大嘅。而且這個升浪係全球性嘅，港股及巴西股市更厲害，分別漲了87%及86.7%！個股中以美銀升幅最勁，一年來飇升346%！
美股昨日由電訊股和金融股帶動，思科(Cisco) 昨日發佈了一款更智能，而且傳送速率更快的路由器CRS-3，其傳輸資料速度，比普通家庭使用者線路連線速度快約1萬倍。據說思科共投資了16億美元發展這個項目，CRS-3將以90,000美元的價格在美國推出。業界指CRS-3將永久性改變互聯網的面貌。美國電話電報公司(AT&T)稱，思科推出的新款路由器將有助於應對未來幾年無線和有線網路資料流程量持續增加的局面。受消息刺激，AT&T漲1.1%；Verizon Communications漲0.9%；思科無起跌。
部份受美國政府深度拯救的金融股市大升，花旗升7.3%，AIG升12.6%，房利美升6%，房地美升5%，兩房日中更曾升10幾個巴仙，但他們已變成1蚊股，股價波動較大。估計「拯救股」大升係由政府將逐步出呢類股份的消息所帶動，而亦花旗確實在市場試盤批股還錢俾政府，它計劃出售優先股，傳聞數量是20億美元，票面價25美元一股，收益率8.875厘，市場反應良好，已有幾倍認購。買呢啲優先股主要賭花旗執唔執，如果花旗唔執，買入硬食佢每年8厘幾回報都幾爽，試想如對沖基金借到錢，1成本金借9成，若借到2厘平錢(只用花旗優先股去按可能按唔到咁多借唔到咁低息，要加其他資產去按)，食佢6厘幾息差，一年執60%，咁回報都勁到爆啦。若果花旗唔死，呢個對沖基金經理先收2%管理費，再收20%分成，收22%，等如硬收呢部份投資總額的13%，瞓身博吓都抵喎。
美股午後回順，升幅收窄，主要係因為金屬期貨價格下跌，導致材料類股偏軟，以及消費類股和醫療保健類股下挫所致。
上面講到對沖基金好搵，但唔識錢搵錢，搵食就愈來愈難。昨日有單新聞，公務員薪俸及服務條件常務委員會（薪常會）建議，將大學學位入職公務員的基準薪酬調低，將來持學位入職的公務員起薪點至少較現時低2000元，最低入職薪酬為19000元。薪常會話調查過私人機構大學畢業生人工，發覺同類公務員起薪點高3400元，所以要調低。
睇完呢段新聞，唔同人有唔同反應，有人話減完之後大學生做公務員仲有19000元人工，都高到爆啦，好多私人機構邊有咁高人工。但也有大學畢業生或做咗幾年嘢的新人類就話，呢啲政府工唔係全部請新畢業生，好多係做咗幾年嘢頂唔順私人機構人工才去報政府工，所以原本21000元人工已經唔係高啦。
我就睇長啲，認為如果香港經濟無大增長，反彈埋今年，又去番低增長期，咁無論公務員或私人機構，工資都好難大升，做得差少少的公司，唔減人工都偷笑。而大學生公務員減完人工之後，仍然係好工，因為相對私人機構而言，公務員工作較穩定，較不受經濟週期影響。
希望年青人睇到呢度唔好鬧我，我係講分析，唔係講意見。香港在大陸旁邊，早前看溫總理接受人民網訪問，講到大陸每年培訓出670萬大學生畢業，要安排咁多大學生就業有困難。大家諗吓，大陸一年培訓等如一個香港人口的大學生出來，而家講全球化，好多工序可以外移，香港大學生面對多大競爭壓力。
講呢啲問題有如瞎子摸象，有人摸象頭，有人摸象腳，人人講法不同，有人話大陸大學生搵唔到嘢做，1000幾、2000元人民幣的都殺，香港大學生唔好諗北上，亦有人話大陸大學生人工愈來愈貴，拍得住香港。我就話兩個講法都啱。
大學生有叻有渣，內地一年出670萬大學生，可能有500萬都好一般，甚至渣渣地，呢批人投到就業洪流中，就成為白領廉價勞工，長遠間接和香港人一起爭同一碗飯食，山東濟南有5個大學生做咗月薪3000元的淘糞工，可以話大學生的工作都可以好低賤，搵唔到工沒法架啦。舉個例，你在香港做IT，香港請個人要10000元港紙，大陸請個人要2000元人民幣，計埋匯價福利等如3000幾元，香港的IT工作，點解唔可以俾大陸大學生取代?
但係講到最top的大學生，例如跨國公關公司在北京請人，最新行情名牌大學生8000元人民幣也不願做了，想要10000元，加埋匯價福利等如14000元港紙以上，可能貴過香港請人了，我估過3、5年北京上海同級人馬大陸工資高過香港。平有平爭，貴有貴爭，你比較兩地大學生就業前景，先要知道自己講緊乜人種，如果係香港渣渣地的大學生，搵到19000元的政府工，一定要做，最好賴住唔走啦，因為行出街可能只係搵到一半，一加咗人工，過幾年市道一變，又擔心俾人裁。記往我係分析走勢，不含價值判斷，唔啱聽一笑置之。
陸羽仁
